لا تدخين بعد اليوم ان شاء الله...

فيه علاج لترك التدخين لكن ابقول كلمتين قبل اتكلم عن العلاج

اولا /
معروف للجميع قوة وبجاحة وسطوة شركات التدخين
فمع هذي القوة صعب تجد دعاية او شهرة للعلاج الي ابقولة رغم انه علاج عظيم .. لكن لو انتشر العلاج هذا عند الناس اكيد راح يكلف خساير كبيرة لشركات التدخين

ثانيا /
العلاج اسمه
Champix

وهذي صوره له




طبعا لو بحثتوا في قوقل عن العلاج هذا راح تشوفوا ناس يتكلمون عن اعراض جانبية للعلاج .. وتعليقي على هذا

مافيه علاج بالكوكب هذا الي حنا به ماله اعراض جانبية
تختلف الاعراض الجانبية او تأثيرها من شخص لشخص
يعني الشخص الطبيعي ما اتوقع بيمر في اعراض جانبية
لكن الاشخاص الي عندهم امراض محددة الافضل يستشيرون طبيب


.......................................


بالنسبة لتجربتي للعلاج :
انا شخصيا حاليا ادخن ، وسبق ان جربت العلاج هذا في رمضان العام الماضي
لكن لما جربت العلاج ما كان هدفي ترك التدخين ... كان هدفي تصبيره فقط في رمضان
ولكن ...

المفاجئة بالنسبة لي ان اكثر من خمس اصدقاء كلمتهم عن العلاج وبعد فترة بسيطة لقيتهم تاركين التدخين
ثنين منهم كنت مستعد اقسم بالله انهم مستحيل يبطلون الدخان
لكن سبحان الله ..
واحد منهم اعطاني هدية قيمة جدا لآني ارشدته على هذا العلاج



ميزة الدواء حسب ما فهمته وابشرح بطريقتي
الحبوب هذي وضيفتها تقفل الخط في المخ بين الخلايا الي ترسل للآعصاب انها محتاجه نوكتين .. فلما يقفل المسار هذا او ما تقدر الخلايا توصل الرسالة للآعصاب راح تلقى نفسك بإختصار شديد تولع اول زقارة بعد الفطور وتتركها على الطفاية وقد تكتفي مزه او ثنتين مجاملة اسم انك ولعت الزقاره !!!

..................


الي يستخدمها راح يترك التدخين بدون اعراض بدون مصخرة بدون وجع راس بدون ملل بدون ما يحس ان في شي بحياته نقص ، بدون ما يحس انه يسوي امور بحياته وهو مهو مستمتع لانه ما يدخن

يعني بإختصار تعيش حياتك كأنك تدخن


...................


استخدام العلاج :

اكيد الي يقرر يشتري الدواء راح يقرا النشره
لكن انبه انه العلبه الآولى تختلف عن باقي العلب في انها ٠،٠٥٪ وبعد اسبوع اعتقد تستخدم ١٪
فاحتمال ما تلقى العلبة الآولى بسهوله بالصيدليات لآنه يكثر عليها الطلب قبل رمضان
العلاج مدته اعتقد ثلاث شهور
العلبة اعتقد قيمتها فوق ١٠٠ ريال تكفي اسبوعين
لكن بالنسبة لأرتفاع السعر فالكرز الآن قيمته ٨٠ ريال فحق شهر يكلفك ٢٤٠ ريال والعلاج هذا يكلفك بالشهر سعر اعلى بشكل جزئي
لكن اذا شفت ان السعر غالي قيسه بسعر الدخان الي تشربه
واذا انت اقتصادي ادرس الجدوى الاقتصادية واذا مهي ناجحة ١٠٠٪ فانا ماعندي سالفة

....................


طبعاً لو بديت بالحبوب اليوم مثلاً فآنت تستمر تدخن لمدة اسبوعين
بعد اسبوعين لازم توقف عن التدخين
ولا تتفاجىء اذا شفت نفسك خلال الاسبوعين هذي تنتظر نهاية الاسبوعين عشان توقف تدخين لأنك راح توصل لمرحلة انك تدخن فقط لآنك ما قضيت الاسبوعين !!

.....................




دعواتي الصادقة لكل مدخن يقراء الموضوع أن يوفقه الله إلى ترك التدخين ...




م / ن